特首CY梁振英早前講到明，要求教育局就小學老師林慧思喺旺角街頭爆粗辱罵警員一事提交報告，搞到外號「吳得掂」嘅教育局局長吳克儉，本來話要告一段落，都要改口話跟進。不過，吳得掂近日參加教育界訪京團，尋日喺北京同傳媒茶敍時就透露，原來到依家林慧思任教嘅寶血會培靈學校都未交報告畀佢，連帶佢都未交報告畀特首。吳得掂身為教育局之首，帶頭唔交「功課」，仲闊佬懶理，兼夾賴來賴去，真係唔知佢想點！

設計圖片及對白

睇過辱警片 唔講觀後感

本來欠交功課，認衰快快趣補交都算喇，點知吳得掂仲話，唔會為校方設立交報告嘅時限，費時畀壓力學校咁話。若果廣大學生都由吳得掂做老師，就認真「皆大歡喜」喇，因為老師唔會追你交功課，「費時畀壓力你」嘛！

吳得掂又話，有上網睇過講粗口段片幾次，但就唔肯講觀後感。佢感慨教育係生命影響生命嘅工作，社會對老師有期望，所以要校方提交報告，但唔擔心將來成日都要提交報告。至於佢畀特首份報告，就仲未決定會唔會加插建議或結論。

培靈學校早前就證實，林慧思會放多一個月「病假」，最快十一月先返學。辦學團體耶穌寶血女修會教育事務主任黃美美尋日回覆，話依家仲喺北京，未知詳情，唔方便評論。

不過，無時限嘅功課，你估會唔會有人交呢？莫講話學校因為林慧思未返學就唔交報告住，就算一味拖字訣唔交報告，睇怕都無所謂囉！CY睇嚟要化身訓導主任，講明再唔交就要罰留堂，先至有阻嚇力喇！

第一手消息請下載on.cc東方互動iPhone/iPad/Android/Windows Phone Apps