廉政寶劍銹斑斑 貪官逍遙樂悠悠
無恥者，最無敵。呢句說話一啲都冇講錯，睇吓前廉政專員湯顯明就知嘞，明明連串貪腐醜聞鐵證如山，明明向立法會發假誓畀假證供罪證確鑿，居然仲死雞撐飯蓋，喺度扮失憶扮糊塗扮無辜，厚顏無恥成咁，立法會就算再開堂炮轟，佢都當搲痕嘅咋！
呢，立法會帳委會尋日再度公審貪湯，要佢為早前供詞同獨立調查委員會嘅報告內容大相逕庭解畫。點知喺三個半小時聆訊中，貪湯大耍太極，帶議員遊花園嘅範圍幾乎仲大過五年任內公帑遊埠嘅總和，一時話唔記得，一時話唔清楚，一時將責任推晒畀下屬，一時將問題歸咎行政失誤，總之面皮三尺厚，你咬得我入咩？
係咪呀，人只要無恥，就可以無敵，貪湯嘅禮義廉程度，除咗佢老頂貪曾，真係冇人出其右。佢話喎，清者自清，自己係有錯失，不過冇誠信問題喎，咁厚顏嘅說話都講得出，仲出席聆訊嚟做乜吖，索性賣廣告控訴全世界冤枉你吖，笨。
咁講啦，貪湯滿口讕言，佢所謂嘅供詞根本不值一哂。太一叮今日反而想同大家探討一個深層次問題，點解貪湯貪腐斷到正，仲可以大言不慚，目中無人？全世界受查貪官梗係頭耷耷眼濕濕o架啦，點會好似貪湯咁仲可以嘴藐藐牙斬斬o架？答案好簡單，因為儆惡懲奸嘅肅貪寶劍生咗銹囉，廉署查貪湯查到無聲無氣，貪湯唔有恃無恐至奇啦！
正所謂，掃帚不到，灰塵照例不會自己跑掉。環顧民主社會，有邊個貪官唔係一被傳媒踢爆即刻見光死o架？德國前總統武爾夫因為受賄醜聞曝光而被迫下台，上年東窗事發，年底上庭受審；內地薄熙來案更加火速調查，火速起訴，家陣連無期徒刑都判埋。香港肅貪連內地都不如，貪湯有乜可能唔也文也武吖！
更離譜嘅係，廉署查貪湯查咗半年如泥牛入海，查前特首曾蔭權爵士更加查咗一年幾都無影無蹤，唔怪得貪曾咁逍遙快活，孭住一身貪腐大罪，仲有閒情逸致同班「曾朋友」富豪豪遊地中海，問你服未。
講起都可悲，回歸以來，香港各方面每況愈下，唯一令港人引以為傲嘅就淨係廉政及法治比內地優勝，如果連呢兩項核心價值都失守，香港唔使等五十年，一國兩制就變一國一制o架喇。如果唔想咁快墮落，唔該廉政寶劍快快出鞘，斬妖肅貪喇，叮！
