城中鏡：唐家成高招替體院搵捐款
西區隧道捐款三十八萬元畀香港體育學院，贊助佢哋嘅「精英教練工作體驗計劃」，而呢筆捐款係因早前一年一度嘅馬拉松活動途經西隧，西隧收到相關機構嘅款項「回贈」，於是就將呢筆由體育活動所得嘅款項捐畀體院，支持體育活動。
唐家成暗示想西隧出年繼續捐款，認真高招。
西隧主席莫偉龍尋日去體院，將呢張大支票移交畀體院主席唐家成，點知唐家成收完支票就即刻笑住用英文問莫偉龍：「出年都應該繼續會有馬拉松，咁你會點處理明年嘅錢呀？」即係暗示想西隧出年都捐款啦！
莫偉龍都相當大方，笑笑口話：「出年我都會喺度（移交捐款支票）」，引來全場大笑。今年啱啱先收完捐款就可以搵定下一年捐款，體院搵捐款果然高招呀！
