「你條賤虫，邊個畀你唔申報坐頭等？你呃我十萬，拍！」淫黎一掌重擊，少膽虫臉上即刻多咗個紅卜卜嘅手印。話說尋日喺美國公幹返嚟，貪威識食嘅少膽虫唔覺意upgrade咗自己上頭等，返到嚟畀淫黎揭穿咗個西洋鏡。事到如今，少膽虫惟有見招拆招……

「腦細，因為你，我先唔記得申報！」少膽虫從褲袋拎出一隻熱狗，遞到淫黎面前，淫黎見狀大怒，馬上想冚多巴，「停！腦細聽我講先，呢個係壹全霉翻身嘅大好機會呀！」淫黎開始遲疑，「腦細，最近我哋嘅米飯班主福伯打住本土旗號四圍遊蕩，我哋一於嚟個反高潮，向世界show-off壹全霉嘅品味！」淫黎開始好奇，少膽虫打蛇隨棍上，「所以我特登hand carry文明世界嘅標誌－熱狗畀你影相擺上臉書呃like……經濟艙好逼，容乜易壓扁件救果仙丹？」淫黎聽了，轉怒為喜，如睹古董一樣捧起熱狗激讚：「嘻嘻，跟得我多，少膽虫你真係叻咗！」少膽虫喜上眉梢，不禁說漏了嘴，「腦細，多得我個friend小明教我咋！」

「邊個小明呀？」「湯顯明！」

第一手消息請下載on.cc東方互動iPhone/iPad/Android/Windows Phone Apps