政壇：搞搞政：KK拋出真心箍激進四子
立法會泛民主派之間有個「飯盒會」交流，各泛民黨派都會派代表定期出席，但由於人民力量、社民連同黃毓民一早離開飯盒會，令飯盒會「散修修」。飯盒會來年將由民協KK馮檢基做召集人，佢似乎雄心壯志，講明自己首要任務係團結泛民，想拉攏激進四子重返飯盒會喎！
設計圖片及對白
冰封三尺非一日之寒，泛民之間各懷鬼胎，分裂係無可避免之事，有泛民中人形容，其實咁樣仲好，可以將泛民光譜拉闊啲，如果大家夾硬綑綁立場，只會將個別政黨模糊化。
不過，KK話泛民得二十七位議員，團結先可以有最佳籌碼同中央談判，力爭最有利嘅政改方案，所以本周五召開首次飯盒會，佢就會同大家傾點樣游說人力、社記同毓民返回泛民飯盒會呢個大家庭。
當年係泛民嫌棄激進四子喺議會抗爭時「暴力」，最終先分家各自修行，現時泛民要增加談判籌碼就搵番四子傾，你估四子係咪咁傻，會做一張用完即棄嘅紙巾呢？究竟KK拋個心出嚟，係咪真係可以黏番四子返嚟，大家拭目以待喇！
