政壇：鍾國斌特訓備戰渡海泳
幾位立法會議員組隊參加維港渡海泳，下星期日就係比賽日子，早前成功通過「試水」嘅紡織及製衣界議員Felix鍾國斌近日加緊訓練備戰，每兩日就游一次千五米。佢話好彩近期經常坐黨友嘅遊艇出海，先有機會進行特訓，但遊艇又關游水乜嘢事呢？
為咗迎戰維港渡海泳，鍾國斌每兩日就游一次千五米。（資料圖片）
Felix話每次坐遊艇出海並唔係玩樂，而係當遊艇駛到海中心，佢就跳落海游返附近沙灘，來來回回游足千幾米先返上遊艇。佢話泳池同大海係兩個世界，如果唔識游大海，喺泳池游到幾叻都無用，所以每逢黨友出海，佢都必定會到，當係熟習大海水性。
最近佢為咗幫業界喺緬甸設立港商工業園，連暑假都要飛來飛去，佢估計飛多一次就可以同當地政府正式簽約，仲話今次港商工業園好受廠商歡迎，其中一間屬藍籌股嘅廠商仲同佢講，希望可以留個大位畀佢設廠喎！
