政壇：蘋果IFC店擬「更上一層樓」
蘋果喺星期一公布，iPhone 5c同5s首個周末嘅銷量有成九百萬部，唔怪得呢排次次經過中環IFC間蘋果專門店都見到一批「果迷」喺出面排隊啦！
IFC蘋果旗艦店據聞會擴建一層。（資料圖片）
唔知係咪因為生意太好嘅關係，《華爾街日報》中文版就刊登咗IFC商場租賃部門總經理Karim Azar嘅報道，佢話一一年先開業嘅IFC蘋果旗艦店，係蘋果公司全球表現最好嘅門市之一。不過IFC旗艦店嘅面積只有紐約第五街旗艦店嘅三分之一咋！Azar仲話，蘋果公司有計劃要將原本兩層嘅店舖向上擴建一層添！之不過呢個消息尚待蘋果公司證實。
照計IFC旗艦店只有兩層真係滿足唔到香港人同旅客嘅需求。事關唔單止喺店入面，就連出面嘅通道都畀「果迷」同「果農」佔據。有口痕友話，蘋果除擴建一層外，最好連走廊都租埋，事關出面係全球有名嘅蘋果手機水貨「散貨場」呀！
