政壇：顏寶鈴做人大似年輕咗
舊年首次參選港區全國人大代表即當選嘅飛達帽業副主席顏寶鈴，呢個人大「新丁」唔經唔覺已上任大半年，造帽做到笠多頂人大帽，會唔會好難兼顧？佢笑言公司業務上晒軌道，唔需要事事親力親為，當選人大反而令佢感覺年輕咗！唔通做人大都係女人青春嘅秘密？
顏寶鈴覺得做咗人大後成個人都後生咗。（資料圖片）
顏寶鈴尋日同傳媒茶敍時講起人大工作，佢自言平日做老闆要一夫當關，人人尊稱佢做「寶鈴姐」兼鬧人唔使本，但當選人大後，發現自己喺男人佔多數嘅人大入面只算小眾，加上年紀喺人大之中亦比較輕，唔少前輩都好樂意提點佢，令佢當堂覺得自己後生咗，感覺自己變咗「寶鈴妹」！但佢強調做人大最緊要係開會前做足功課，咁即使做「新丁」都冇有怕。
講起帽業生意，喺孟加拉嘅廠房自舊年正式投產愈做愈大，所以佢每個月都要兩次飛去當地監督吓，期間留宿酒店。但佢大呻當地附近得兩間高檔酒店，房價每晚四百美元（港幣三千一百元），幾唔划算，仲透露有朋友撩佢索性喺當地建酒店就唔使咁頭痕。唔通佢想做埋「酒店大亨」？佢笑言都係諗吓啫，未有大計o架！
