錢多未必好辦事 資助換車惹爭議
開講有話，錢多好辦事。港府窮到只剩下錢，究竟係咪好辦事呢？相信大家都知答案。呢，當局多次資助車主更換舊式柴油車，反應冷淡，爭議不斷，咪就係有錢都辦唔到事嘅例子囉。
話說港府原本計劃斥資一百億元資助車主更換歐盟四期以前嘅商業柴油車，但業界認為資助金額不足，資助模式亦有問題，以致響應者寥寥無幾。經過多輪討價還價，當局被迫「加碼」，將舊式柴油車嘅退役期限推遲一年，並將資助金額增加到一百一十七億元，每架舊車可獲得兩成七至三成三資助。環境局局長黃錦星話喎，今次增加資助金額，提供靈活安排，希望可以鼓勵業界盡快換車，幫助改善空氣質素。
可惜，運輸業界就未必咁睇。正如有司機話齋，家陣買架新貨車閒閒地超過一百萬，就算獲得三十萬元最高賠償，好多人仍然負擔唔起，隨時有兩至三成司機被迫退休或轉行，所以咯喎，業界就算贊成有關方案，都係無奈接受咋。
其實，凡係涉及公帑嘅計劃，一向都有好大爭議，資助太多納稅人冇可能同意，資助太少車主又唔會接受，可以講係順得哥情失嫂意。最怕嘅係，部分買唔起新車嘅車主最後淪為失業人士，到時環保問題未解決，又要面對失業問題，你話係咪搵嚟搞吖！
仲有吖，港府使咗咁多錢，究竟係咪可以改善空氣質素，根本冇人知。有辦你睇，前朝政府曾兩度推出柴油車資助計劃，結果分別只有兩成九及一成一車主換車，期間空氣質素唔只冇改善，反而更加惡化添。係人都知，香港空氣污染原因複雜，除咗舊式柴油車，仲涉及電廠及內地等多個污染源頭，港府搞唔掂電廠，對內地更加無可奈何，淨係識小修小補，一時停車熄匙，一時資助換車，根本就係九唔搭八。
冇法子喇，港府環保一味講錢，唔係用公帑資助車主換車，就係向市民伸手。嗱，當局今日將公布垃圾徵費計劃，無非又係將環保責任推畀市民。正如有人話齋，可以用錢解決嘅問題就唔係問題，港府對改善空氣質素束手無策，唔係因為市民唔肯負擔，而係因為官僚卸責。講到底，資助車主換車又好，垃圾徵費又好，純粹得啖笑嘅咋。
所以話，港府靠得住，豬乸會上樹。與其旨意港產官僚改善空氣質素，不如大家買番個防毒面罩仲實際，叮！
