SUN搞作：打橫嚟講：放生「限奶令」的民望測試
民望高的食物及衞生局局長高永文失驚無神，尋日喺電台宣布會於十．一黃金周期間，做個放寬「限奶令」嘅「壓力測試」，話睇吓呢幾日香港奶粉銷情的變化，套取數據來「研究吓」應否「撤銷」禁止大陸同胞（水貨客）搶購奶粉之「限奶令」喎！
唉！全球仲會唔會有政府白癡到如香港特區廢柴咁seveno架！你派個高級官員出嚟爆響口做實驗，人家唔通蠢到特登玩對抗，湧去盲搶奶粉咩？相反，一定配合大家雙方度好晒的劇本，做齣好戲，令到港方嘅「供應鏈」完全perfect：「儲存充足，貨源正常，補貨無缺」啦！
呢個戲碼，並非向香港媽媽派定心丸，博好感，而係「做靚盤數」作「呈堂證據」，推出「撤奶令」之事前準備咋！
全世界都知，香港公共政策，係「無投訴就無人做嘢」嘅！好端端，一個叫港媽安心，BB食得開心嘅良策，執行咗半年之嘛！就要反枱再「從頭玩過」？當然，奶粉供應商囤積同生意少咗，梗係想重開番個「內地市場」啦！而香港政府官員一向唔做就唔講，今日大鑼大鼓話做「測試」，咁咪即係佢哋有「壓力」囉！而且，一定係「政治壓力」添！
大家都知，來港搶奶粉的，除少數老實「自用」嘅散客外，全是有勢力嘅集團經營的！
背後的利益和影響，又點會係一個特區小局長可以bargain的呢？加上，有人以「限奶令」違反香港自由市場原則，好應重回正軌，畀同胞自由「買賣」呀！
嗱！有無港人出嚟尋釁滋事，暫時未知，但港官再不能捍衞香港利益，這就十分明顯矣！
高永文嘅民望最高吖嘛！咪消費吓你囉！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
