民政事務局副局長許曉暉（左）帶定啲橄欖油上京防乾燥，右為自稱做「打雜」嘅陳岳鵬。
唔少機場航班受到颱風「天兔」影響而取消或延遲，搞到呢兩日機場逼爆，除有大批旅客等候機位外，仲發現有政商界人士啟程上京，無論機場離境大堂定係機場貴賓室通道，都見到佢哋蹤影，非常熱鬧。有人估計，喺呢個政改鬧得熱烘烘嘅敏感時刻齊齊訪京，唔通京官有重要訊息宣布？
馬逢國（右）同吳清輝行到離行離列，前後腳入閘。
方文雄（左）抵達機場貴賓室。
徐英偉帶埋私伙相機做隨團攝影師。
蔡冠深承認搭飛機上北京。
尋日晨早七時許，一眾副局長同政治助理陸續抵達機場離境大堂辦理登機手續，雖然佢哋「散修修」各自各入閘，顯得毫無隊型，但原來一早分晒工，有晒默契。由於今次訪京無新聞秘書隨團，所以團長邱誠武決定派出兩位做過記者嘅財政司司長政助羅永聰、食物及衞生局政助陳凱欣負責應對傳媒問答。
徐英偉帶埋私伙相機
教育局政助施俊輝專責做筆記，方便其他團友重溫訪京資料，而民政事務局政助徐英偉就負責做隨團攝影師，仲出動私伙相機。咁政制及內地事務局政助陳岳鵬又做乜呢？佢話乜都做，總之冇人做嘅佢就去做喎。咁即係打雜？
此外，又喺離境大堂巧遇港區全國人大代表馬逢國同浸會大學前校長吳清輝，佢哋有傾有講表現得好老友，但一見到記者就顯得好愕然，然後扮唔識前後腳入閘。為乜咁緊張呢？其實佢哋都屬於政團新世紀論壇，莫非今次都係跟大隊訪京？
至於貴賓室通道亦非常熱鬧，唔少人大政協都趕搭飛機離港上京，好似全國政協委員蔡冠深同方文雄、港區全國人大代表胡曉明同霍震寰等人，佢哋分別屬於中華總商會、香港專業及資深行政人員協會嘅高層，點解同一時間有咁多人一齊上京呢？認真耐人尋味。
第一手消息請下載on.cc東方互動
