設計圖片
雖然立法會下個月九號先至復會，但一班議員已急不及待提出動議辯論。點解？事關過往喺新立法年度首次大會，特首就會喺會上發表施政報告，但今屆政府就改咗喺一月先至發表施政報告，咁頭炮會議嘅賣點自然落喺動議辯論身上，啲議員梗係想爭取喺復會後首個大會曝光啦！但爭取還爭取，始終都係要抽籤決定o架!
工程界WK盧偉國同建築、測量及都市規劃界Tony謝偉銓就先拔頭籌，但係佢哋提出嘅都係老掉牙嘅議題，估唔到立法會靜咗咁耐，一開波就由兩個悶人加兩個沉悶議題打頭炮，簡直就係放悶蛋，唔通佢哋體恤一眾議員同事外遊返港後會攰得滯，驚佢哋仲係遊魂咁，等大家開會可以瞓吓覺？
惹火議題無被抽中
講清楚啲，WK同Tony呢對「建築界雙雄」不約而同抽中喺下個月九號、即立法會復會後首次會議提出議案辯論。前者議題係「制訂長遠基建規劃、推動可持續發展」，後者就係「制訂住屋開支上限及人均居住面積標準」。呢兩個議題過往都有相關嘅討論，唔算有新意；反而一啲會有機會激起火花嘅議題例如議員謝偉俊提出嘅「檢討廉政專員委任、問責及廉政公署甄選調查案件透明度」，同埋黃毓民提出嘅「對立法會主席投不信任票」等，就唔知幾時先抽得中喇！
既然復會後首次大會冇咗發表施政報告，只得兩個悶蛋動議辯論，睇嚟都冇乜睇頭，更談不上會擦出火花，都係畀班議員喺度噴下口水花啫！
第一手消息請下載on.cc東方互動
