濫用資源易識別 博懵官僚難根絕
「如果要為呢段感情加上一個期限，我希望係一萬年。」呢句電影對白道出一個人生哲理，就係萬事萬物都有期限，過期作廢，連愛情都唔例外。冇錯，任何嘢都有過期嘅一日，愛情會過期，麵包會過期，連身份證都會過期o架，大家記唔記得，申訴專員公署曾經炮轟當局把關不力，任由非香港居民拎住張過期身份證去公立醫院睇症，搞到公共醫療資源被濫用吖？
嗱，眨吓眼過咗三年幾，港產官僚終於做嘢補鑊嘞。當局宣布，由今個月二十八日開始，到醫管局及衞生署求診需要出示身份證，經職員透過新聯機系統核實香港居民身份之後，先至能夠以「符合資格人士」嘅收費水平享用資助醫療服務喎。
簡單啲講，即係以後睇症要查證，揩油病人現晒形。所謂揩油病人，多數係非香港永久居民，例如曾經喺香港工作或就學嘅人士，仍然使用未交還嘅身份證享用資助公營醫療服務，對納稅人梗係唔公平。
話時話，蒼蠅不叮無縫嘅蛋，點解公共資源遭濫用？咪就係有漏洞可鑽囉，當局無監無管囉，公立醫院無掩雞籠囉。在問題被揭三年之後，當局先至推出查證制度，唔通醫管局真係資源多得滯？
仲有吖，公共醫療資源被濫用，後遺症何止政府收入減少咗咁簡單，更加令本已捉襟見肘嘅醫療服務百上加斤，間接剝削本地居民嘅應有權益添呀。呢幾年公院資源同人手瀕臨爆煲，不勝負荷，怨聲載道，當局其實就係罪魁禍首！
所以話，見到呢個聯機系統面世，太一叮真係悲喜交集。喜嘅係終於有措施打擊博懵病人，公共醫療資源有望減少被濫用，而悲嘅係當局懶散作風十年如一日，本港醫療系統點可能唔亂七八糟呢？查實，醫療庸官○二年已經發現「過期證」漏洞，但係一直闊佬懶理，關人個關，點知事後補鑊都慢條斯理，拖拖拉拉，睇嚟正在浪費資源嘅唔止係揩油病人，仲有懶散官僚。
揩油病人易識別，胡混官僚難根絕。點都好啦，遲到好過冇到，遲補鑊好過冇補鑊，希望公共醫療資源被濫用嘅問題可以撥亂反正啦。如果問題仍然未解決又點？不如咁啦，由港府推行一套官員核實系統，將尸位素餐嘅「不符合資格人士」全部踢走，咁就一天都光晒咯，叮！
