家陣，喺香港呢度，不管發生任何社會衝突（噢！應叫做「社會議題」至啱），政府高層及其手下及其粉絲及其喉舌們定必撲出嚟大叫：喂喂喂！搵錢要緊呀！睇住香港個經濟呀！總之，一切以金錢掛帥為先！

好吖！講錢囉喎！有無人願意年花二百幾三百萬（仲未計福利和津貼，同埋，唔係咁易睇到嘅「着數」），請個廢柴做嘢呢？吖！嚴格來說，呢件廢柴係無做嘢嘅！

香港廢柴政府集團內，有條粉腸發展局局長陳茂波上任足一年矣！佢有乜好事做過呢？請問？劏房？醉駕？定係囤地呢？佢每次被揭糗事後，總失蹤一輪的！但糧就照出。

嗱！上次見佢時係咸豐年咁耐矣！繼囤地門爆破後，佢就縮埋無蒲頭，直至兩個幾月後，趁大家就快「永遠懷念」佢之際，他才以「鍵盤戰士」身份，匿在黑角寫網誌「局長隨筆」想盲搶郊野公園地，連資料咁低層次嘅錯誤也犯上，當然畀人插到亞媽都唔認得啦！之後，又唔見咗人嘞！至上個禮拜，又寫網誌，話「保育古蹟」喎！今次無舐嘢，江湖傳說，此乃係佢啲助理嘅功課喎！

佢終日閃埋，無面見人，即使老左搞國慶酒會，不得唔畀面，劏房醉駕囤地波亦躲在林鄭奶媽背後，要林太開路，帶佢走！哼！呢個星期，佢又戰士上身，寫blog講單車徑，唔知呢份小朋友功課有幾分呢？

喂！你老細兼拍檔振英特首話要同市民零距離接觸o架！連你哋嘅外圍戰友周融及愛港之聲班友出錢又出力做緊嘢時，你只顧匿埋上網當做咗，我建議佢份糧喺個網上出畀佢就算咯！right！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps