城中鏡：莎莎太子女風中拍拖

強颱風天兔襲港，好多人都選擇留喺屋企，但莎莎國際太子女Melody郭詩慧同老公Davis陳振邦就喺前日風球懸掛之下去咗中環ifc商場拍拖購物，Melody仲要喺天文台改掛八號風球、百貨公司提早閂門前一刻買咗一件心儀嘅外套，總算有啲收穫。Davis話唔想喺三號風球呆坐家中，於是先將囝囝交畀傭人照顧，然後就同太太出去行街，夜晚就買外賣飯盒返屋企慢慢歎。Davis當時估計，尋日中午前市面一切會回復正常，仲話已經為旗下員工做好晒突然上班嘅安排，睇嚟佢都算得準喎！