城中鏡：鄧達智地獄特訓 擊退病魔
呢排有齣講述拳擊嘅電影爆紅，令綜合格鬥技（MMA）拳擊運動再掀起熱潮，連著名時裝設計師William鄧達智都加入拳擊行列。
鄧達智（右）同葉家麟都鍾情拳擊。
葉家麟（右）找來助教許孝榮勤練拳擊技巧，全身肌肉結實不少。
鄧達智（右）拜師電影武術顧問陳達禮苦練綜合格鬥，對抗手臂肌肉萎縮。
熱愛踩單車同跑步嘅William，十多年前喺新加坡意外跌倒，佢未加以理會，直至三年前手部麻痹，先至知道大鑊。為自救，佢冒險接受頸椎大手術，原本打定輸數，因為手術一旦失敗，下半生從此要坐輪椅，但幸運地手術成功，行得又走得。正當慶幸病魔遠離之際，年幾前中醫師又發現佢手臂肌肉逐漸萎縮，就連「老鼠仔」都唔見埋，佢心情跌至谷底，為免肌肉萎縮加劇，月前下決心苦練體能，重燃生命鬥志。
受「大隻佬」熱潮影響，William試玩難度極高嘅MMA，拜師電影中嘅武術顧問Henry陳達禮，展開地獄式訓練；而曾習泰拳嘅啤酒代理商葉振南兒子Albert葉家麟都加入特訓。訓練當日，Henry拍住曾奪巴西柔術香港公開賽藍帶組冠軍嘅許孝榮，當正William同Albert係正式MMA拳手般訓練，包括練習用健身球狠勁地踏前撞擊對手、單膝跪壓揮拳等，又找來四條大麻繩狂操臂力，個半鐘頭不停咁練，兩人攰到流晒大汗。
葉家麟激讚有挑戰性
William話幾攰都會咬緊牙關，為日後由西班牙西北面徒步往法國做準備。Albert就激讚着重地板扭鬥嘅巴西柔術好有挑戰性，令佢明白人生即使跌倒，一樣可以絕地反擊。
