前勞工及福利局局長政治助理Zandra莫宜端同政務司司長前政助張秀麗先後辭職，雖然佢哋都話因想照顧家庭，但唔少人都質疑佢哋係咪「跳船」。最巧合嘅係，話過辭職係想做個好媽媽嘅Zandra，尋日竟然獲批准出任一間學校嘅助理總監，下月履新。點解忽然間可以由全職媽媽變咗再就業嘅呢？

設計圖片及對白

政府尋日就公布，前任行政長官及政治委任官員離職後工作諮詢委員會，已就Zandra出任兒童無限學校（九龍塘）助理總監（研究與發展）一職畀意見。委員會認為，喺Zandra遵循委員會意見嘅前提下，佢離開政府後擔任嘅新工作唔會損害或削弱政府履行職能嘅表現，唔會構成任何潛在利益衝突，亦唔會引致公眾產生負面觀感，令政府尷尬，所以批准佢出任新職。

其實Zandra辭職，唔少人都質疑佢係咪想「跳船」，但佢矢口否認，仲話辭職只係因難以同時兼顧仔女，而佢只想做個好媽媽，全心全意照顧仔女，暫時都唔會接受全職工作。當時特首為咗叫大家唔好揣測咁多，仲拋出一句︰「時間會證明一切」。點知佢上月二十四日離任後，事隔一個月，佢已證明一切。

據了解，雖然佢喺嗰間學校只係兼職，主要負責家長教育同溝通方面嘅工作。加上佢嘅仔女原來都喺呢間學校讀書，湊完仔女返學，就喺學校搵啲嘢做吓，咁佢就無論喺屋企定喺學校都可全天候睇實對仔女啦！話時話，如果佢要超時工作，對仔女係咪陪佢一齊留堂呢？抑或佢份工唔使超時工作嘅呢？

第一手消息請下載on.cc東方互動iPhone/iPad/Android/Windows Phone Apps