政壇：內地傳媒猛噏撤限奶令
嚟緊十．一長假期，大批內地人將會來港旅遊兼掃貨，去年今日奶粉仲係佢哋嘅必掃品，但自今年三月限奶令出台後，已經再無掃奶粉呢支歌仔唱。唔知係咪內地傳媒知道內地人同水貨客憎限奶令憎到入骨，只要報道限奶令快要撤銷就有收視，於是將日前食物及衞生局局長高永文講嘅十．一前後會為奶粉供應進行壓力測試，報道成下月就會撤銷限奶令，仲話香港知錯云云，真係得啖笑。
設計圖片
壓力測試當取消
尋日上google用「限奶令、三字搜索，就會見到「香港限奶令迎結業考」、「香港黃金周後或取消限奶令」同「香港或取消限奶令」，仲有「知錯能改，善莫大焉」呢類標題，唔知畀佢嚇一跳，知道內情就得啖笑。呢幾篇內地報道其實只係覆述高永文日前話奶粉壓力測試已準備就緒，會喺十．一前後測試奶粉整體供應、零售鏈補貨機制、訂購熱線同零售點預訂奶粉四個範疇，從來無講關於限奶令壽終正寢嘅內容。
其實限奶令今年三月開始生效後，內地人就覺得唔公平、歧視內地人、破壞香港自由市場招牌等，日望夜望限奶令撤銷，內地傳媒就配合吹風，無厘頭都會話限奶令快玩完。最慘呢啲標題嚇親香港媽媽，有人喺討論區話如果撤銷限奶令就會上街，又有媽媽擔心一個月大寶寶就快無奶粉食。
食衞局尋日重申，任何有關限奶令建議必須持久及經得起需求高峰期，例如十．一黃金周同農曆新年前嘅考驗，睇字眼限奶令唔會咁快完，海關就話去年至今個月中，已有近一千四百宗違反限奶令個案嘅涉案人士被定罪，唔想被罰，都係遵守法例好啲。有人就話，啲人與其埋怨港府限奶令唔公平，不如將精力要求內地部門搞好貨品嘅品質保證，重建人民消費信心，咁就唔使來港撲奶粉，亦毋須搞限奶令啦！
