急驚風遇慢郎中 消防醫局太不仁

嗱，講起消防處同醫管局嘅一條龍「害人」服務，不得不提一宗最近發生嘅延誤救人事故。話說一名兩歲半男童因流感上腦而發高燒及嚴重抽筋，家人急打九九九召援，點知最先到達嘅只係受過基本救護訓練嘅消防處先遣急救員，等到救護車將男童送抵屯門醫院急症室，距離召喚已經過咗三十六分鐘，你話港產官僚係咪救人慢幾拍吖？

咁都未算，男童喺急症室一直抽筋不止，但係等咗一個小時至轉送兒科深切治療部，結果因為腦部缺氧而可能變成植物人。唉，簡單講，男童不幸急驚風，點知唔止遇上慢郎中，仲遇上一間「慢症室」，最後延誤救治，慘成搶救失誤受害者。

喂，港產官僚，你哋究竟係救人定害人o架？搶救病人唔係爭分奪秒嘅咩，為乜救護車會姍姍來遲？為乜急症室會延誤救治？搶救生命即係同時間競賽，但係緊急醫療系統甩甩漏漏，救護車拖一拖，急症室又磨一磨，病人想唔出事都難啦，叮！

消防處同醫管局明顯辜負拯救生命嘅重責，「東方報業民意調查」顯示，四成六受訪者認為事件反映白車及救護員嚴重不足；三成二人批評消防處以先遣急救員救人係想「頂住先」；一成八更直斥白車姍姍來遲會延誤救治。對於急症室冇及時送男童到深切治療部急救，四成七受訪者直指反映醫院前線資源及人手不足；兩成七人斥處理急症慢吞吞；兩成人指涉及人為疏忽。

搶救病人慢吞吞，消防醫局雙冠軍。講到對病人麻木不仁，呢兩個「正苦」部門認咗第二，真係冇人敢認第一o架。呢嗱嗱嗱，尋日一名癌病婦人因為感到不適乘的士到沙田威爾斯親王醫院求診，豈料途中突然吐血及陷入昏迷，的士司機飛奔急症室求助，點知只得一名在場救護隊目伸出援手，而其他救護員居然袖手旁觀，被質疑見死不救，問你點頂。事情延誤咗大約五分鐘，婦人先至被抬上病床推入急症室搶救，但為時已晚，返魂乏術。

延誤搶救害病人，港產官僚太不仁。太一叮想問港府最高層，緊急醫療系統就快暴斃，你哋遲遲未肯出手搶救，遲早作繭自縛，自食其果嘅咋，叮！