SUN搞作：打橫嚟講：「香港流行歌壇之死」
作家李純恩喺微博鋪貼《香港歌壇之死》，鞭撻「現今歌詞感動不了人，時下歌壇謀生的人像文盲……」旋即，惹來香港填詞人黃偉文開拖：「到底是我在騙稿費胡言瞎填一通，還是他在騙稿費胡言亂吠……」隨之，一大棚香港歌壇「持份者」吶喊幫腔，群毆圍攻李純恩，竟無人幫拖！
嗱！要否理性討論先？有冇個人恩怨先？若心平氣和的看問題，李純恩或許講大咗，但亦不是全無道理！今天香港歌壇之敗象，已爛到入心，單靠把口死撐，而不正視或面對「死因」，只不過是阿Ｑ的可憐相，遲早一定死！
香港教育制度崩壞，學生語文水平滑落，莫說精簡的填寫一闋歌詞，就是平時講嘢，也詞不達意啦！言之無味，內缺深度，故曲詞唔啱音的情況，於詞藻貧乏下，已成常態；加上，歌手五音不全，錄音時的「監工阿頭」漠視懶音，咁點提升歌曲質素呢？
唱片公司是打開門做生意的商業機構，一切多以賺錢為優先考慮，北上發展是最為首要，製作廣東歌？出粵語唱片？盤算旗下藝人的主要市場？香港地區？算罷啦！資源投放之分配，有幾多是支持本地的呢？面對現實吧！
即使，要做點「門面工夫」，撐住香港本地創作，那些一線大歌星一直都要先霸住「好歌」嚟唱，剩下的，才輪到下面執嚟用，已是何等貨色？難道，叫天王級數的唱唔入流嘅「K歌」？
阿哥級的填詞人願將最嘔心瀝血的「作品」，畀「周一鑊」嗎？高手產量少，培育後進機會低，試問，咁嘅困局，神仙都難救啦！今日，只不過畀李純恩戳爆一角啫！就發惡喊打，是因為業界壓抑太久太辛苦了！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
