城中鏡：湯恩佳聽二胡不知肉味
身兼選舉委員會成員嘅孔教學院院長湯恩佳，推動喺香港興建孔廟二十幾年，最近孔教學院建議喺鑽石山大磡村舊址起本港首間孔廟，獲黃大仙區議會支持，湯恩佳開心到不得了，盼望盡快同政府傾掂補地價等細節，四、五年後落成使用。
湯恩佳（中）首次與王國潼（右）同王憓（左）兩父子合作，冀同市民分享孔聖愛樂之美。
孔子崇尚禮樂，鍾愛二胡嘅湯恩佳即將夥拍二胡大師王國潼同「二胡王子」王憓父子，喺十月上旬舉辦一場名為「三月不知肉味」嘅二胡音樂會。湯恩佳話二胡係世界上最好聽嘅樂器，佢都好鍾意聽京劇，有時亦玩票性質唱兩句，佢形容有時聽得太投入，嗰種餘音繞樑嘅感覺，真係似足孔子當年聽到齊國韶樂，三個月唔知肉嘅美味嘅境界。王憓就建議孔廟落成後，佢可以間中到孔廟演奏，湯恩佳聽完都讚好，仲話諗住退休後學拉京胡添！
湯恩佳笑稱對孔教嘅任務仍未完成，會繼續要求政府將九月二十八日孔誕日列為公眾假期，仲有將教師節由九月十日改去九月二十八日。
