城中鏡：陳國民訪印咖喱食到怕
近年港商除咗北望神州，亦樂於喺東南亞國家發掘商機。「家電大佬」德國寶董事長Edward陳國民日前隨香港工業總會到印度考察一周，睇吓當地嘅市場及營商環境。問起考察後感覺如何？佢聳聳肩回答：「香港人喺嗰度好難搵食！」
陳國民認為印度現階段唔適合港商投資。
Edward話印度人生活水準低，以低端市場作主導，文化、語言上嘅差異又大，唔啱香港人做生意，所以佢得個睇字，投資就咪喇，食吓咖喱就無妨。佢話此行食得最多係咖喱，差唔多餐餐都有，辣度唔高但香料味極重。佢笑言頭幾餐都食得幾過癮，之後開始食到怕，於是同團友四出搵中國餐館歎番餐。
印度食物衞生唔多好，Edward話唔敢亂食嘢，食中菜會幫襯五星級酒店，全程都飲樽裝水以免中招。年底工展會話咁快又到，Edward話今年會推出二十多款新家電，依家已經要忙於籌備展位，嚟緊又要飛去台灣視察廠房，認真係大忙人。
