城中鏡：臨走唔睇路跣腳 大劉險仆親
人稱大劉嘅華人置業主席劉鑾雄聲稱因病，一直無去澳門受審。最近佢一連兩日喺灣仔某富豪飯堂發表偉論，向部分傳媒自爆官司所謂嘅「內幕」，一度揚言「預咗畀人喺街亂刀斬死」，又話有人陷害佢等等，講嘢有一句冇一句，講到好似猜謎語咁。尋日中午三號風球下，大劉再現身富豪飯堂，今次佢收晒口無出聲，但係臨離開時幾乎仆親，唔知係咪又畀謎語大家估呢？奉勸大劉，行路要睇路呀。
大劉（前中）拖住女兒劉秀盈（前左）落車行入富豪飯堂，前右為呂麗君。保鏢同司機喺後面打傘。
飯後大劉（後左）、呂麗君（後右）同劉秀盈（前右起）、劉媽媽同劉玉珍離開，大劉仲行得好正常。
點知梯級都未行完，大劉就幾乎仆親。
大劉涉嫌以二千萬元賄賂澳門前運輸工務司歐文龍，澳門法院仲審緊呢單官司，但大劉一直聲稱因病拒絕受審。大劉一直對自己捲入嘅澳門貪腐賄賂案隻字不提，但前兩日佢突然一反常態，無端端發表偉論話有人害佢，又話有人想殺死佢，但講嚟講去都唔知佢講乜。
今次要猜乜嘢啞謎?
尋日大約中午十二時三十五分，佢拖住女兒劉秀盈同女友呂麗君抵達灣仔富豪飯堂，對於傳媒追問佢官司進展，佢都毫無反應，一支箭咁走入飯堂。
逗留咗唔夠一個鐘，大劉一家三口就同一早到場嘅劉媽媽、胞妹劉玉珍齊齊離開，無再好似之前兩日咁，突然叫部分傳媒入內聽佢發表偉論。佢嘅四位屋企人落樓梯時都好哋哋，唯獨大劉落樓梯時，唔知佢係無睇路定腳仔軟，行行吓突然間唔知差錯腳定係跣腳，好彩佢無失平衡仆倒，否則都幾傷吓。記者見佢無啦啦跣腳，當然問佢身體狀況係點，同埋究竟會唔會到澳門法庭應訊，但大劉都係毫無反應，一句說話都無講就搭座駕離開，今次又唔知要大家猜乜嘢啞謎。大劉下次落樓梯，記住睇路，小心仆親呀。
