舊年港產保釣船「啟豐二號」孤軍作戰下成功登上釣魚島，係十六年來首次再有華人登島，亦為本港保釣運動寫下歷史一頁。一年過去，保釣船有望十月再啟航，舊年負責開船、「一瞌埋眼就衝」嘅敢死船長楊匡作為成功登島嘅重要功臣，今次出海竟然冇佢份，保釣班兄弟更揚言以後都唔會預佢添！究竟發生乜嘢事，搞到班兄弟內訌？

設計圖片

羅堪就：冇一個兄弟撐佢

我哋就內訌傳聞搵過保釣成員「阿牛」曾健成，佢先係話同楊匡好耐冇聯絡，又以「買牌船長」揶揄楊匡，透露佢利用船長牌中港互通機制，先喺內地「買」船長牌，等三年再向海事處免試取得香港牌照，暗示楊匡根本唔識揸船。所謂楊匡喺緊急關頭親自駕駛，阿牛坦言當時身處駕駛室，佢向兩名正牌船長發號施令嗰陣，「楊匡根本唔喺駕駛室，最多出面頂吓水炮」喎！

阿牛又投訴，話兼負對外通訊重任嘅楊匡，登島一刻竟然掛住喺社交網站戶口「打卡」，而冇按保釣委員會指示喺官方網頁更新消息，直斥楊匡將消息「出口轉內銷」咁話。啟豐二號船東羅堪就亦批評，楊匡為達到個人野心而唔聽船上總指揮指示，重要時刻又冇留喺駕駛室，船上兄弟都非常不滿，直言「冇一個兄弟撐佢」，所以已經安排三名成員喺香港正正經經考番個船長牌，以後唔使再靠楊匡喇！

不過，楊匡強調自己盡職盡責，反駁話船長唔一定要親自揸船，仲向我哋展示海事處發出嘅船長三級證明書，話事實可以證明一切喎!

楊匡舊年面對日艦圍攻嗰陣係咪親自掌舵直搗釣魚島，兄弟間各說各話，但若果登島保釣呢項偉大事業，最終因為班兄弟不滿楊匡「打卡」搶風頭而引發內訌，甚至要夾手夾腳踢走佢，成件事真係好笑又兒戲囉！

第一手消息請下載on.cc東方互動iPhone/iPad/Android/Windows Phone Apps