政壇：黑英網上教路追「風」
吹襲完台灣後，強颱風「天兔」正面吹襲香港，成為本港六十年來第二強颱風，僅次於一九七九年嘅颱風「荷貝」。當年「荷貝」造成十二人死亡、八百人無家可歸，如今「天兔」對香港有幾大影響仍然係未知之數。強颱風臨近，天文台一眾職員忙個不停，天文台前台長「黑英」林超英雖然已不在其位，但佢仍然非常關心風暴情況，尋日仲喺社交網站教大家點樣去追蹤「天兔」。
林超英喺社交網站教大家點追蹤「天兔」。（資料圖片）
尋日下晝，佢話如果大家想了解「天兔」嘅路線圖，可以上內地中央氣象台網頁瀏覽汕頭雷達圖，又話最新影像顯示天兔風眼完整，叫市民唔好低估「天兔」對香港嘅威脅。當「天兔」遠離汕頭而接近香港一帶時，市民就應該改為上香港天文台網頁，睇吓「天兔」嘅強大勢力。佢仲喺社交網站提供咗上述兩個網頁嘅超連結，只要一篤就去到嗰兩個網站，超方便。
