政壇：港產科研系統揚威深圳
唔少大學校長先後批評政府對科研發展不力，好彩大學本身都好爭氣。由本港學者研發嘅集成監察系統，中標贏得大中華區最高建築物深圳平安金融中心嘅結構安全監控合約，價值七百二十萬元人民幣（約九百一十一萬港元）。研發該系統嘅城市大學土木及建築工程系教授李秋勝指出，呢個系統可及早察覺施工中嘅偏差同潛在問題，確保施工精準，樓宇建成後，感應器將繼續運作，長期收集數據維持大樓嘅保養維修，確保結構安全。
李秋勝中標贏得大中華區最高建築物深圳平安金融中心嘅結構安全監控合約。（城大提供）
預計喺一五年竣工嘅深圳平安金融中心，位於深圳福田商業中心區，該中心包括一百一十八層高嘅辦公樓、商業大樓同塔尖部分，主體結構高五百八十八米，連塔尖則高六百六十米，料完工後會成為中港台三地最高、全球第二高嘅建築物，因中心位於華南地區，颱風、暴雨同潮濕等氣候將影響物料運用同設計，對施工構成困難。
李秋勝團隊研發嘅集成監察系統，有八項新型監察設備同技術獲得專利，運作方面，會喺大樓內安裝五百個傳感器，實地收集氣象數據同工程數據，配以自行研發嘅軟件系統，更準確地指導和監察施工過程。當大樓完工後，可憑採集嘅風壓力、地震荷載等數據，評估大樓結構嘅局部及整體安全程度。佢又話今次投標成功，代表研究適合於實際工程，有助將來建造更高更安全的超高大樓。
