政壇：泛民盲搶單程證審批權
今時今日做政黨真係容易，好多嘢講得就講、噏得就噏，都唔使理現實可唔可行。講緊嘅係有泛民人士對單程證審批權嘅立場。話說尋日香港電台節目《城市論壇》討論內地人潮湧港衍生嘅問題。出席嘅新民主同盟立法會議員范國威同台下嘅白鴿黨總幹事林卓廷都不約而同，要求特區政府收回內地人移居香港嘅單程證審批權，完全唔理《基本法》第二十二條寫到明中央先有權審批單程證，林卓廷甚至話可以修改《基本法》添！此言一出，台下即時嘩聲四起，取笑依家啲政黨中人冇政治常識！
設計圖片
《城市論壇》尋日請咗香港大學社工及社會行政學系教授葉兆輝、范國威同時事評論員劉銳紹，仲有在港內地畢業生聯合會主席耿春亞講內地人潮湧港問題。范國威話依家內地人來港嘅數量已超過香港嘅承受能力，無論係內地水貨客、雙非孕婦、跨境學童、新移民都影響緊香港人日常生活，要求政府檢討人口政策，包括取消自由行一簽多行，甚至收番單程證審批權等。
變相提倡「鎖港」
坐喺台下林卓廷同台上嘅范國威「唱雙簧」，話收番單程證審批權好簡單，仲好理所當然咁話：「如果香港有需要，《基本法》都可以改！」
不過，其他嘉賓同台下觀眾就唔太認同呢番言論嘞，反駁話《基本港》第二十二條寫到明中央先有單程證審批權，仲批評泛民咁講等同提倡「鎖港」，對香港長遠發展無好處，甚至會嚇怕啲內地專才、優才唔敢來港，佢哋都講其實內地新移民嚟香港唔係只有害無利，佢哋都做咗好多香港人唔肯做嘅工作，推動香港經濟。
其實政務司司長林鄭月娥早幾日出席一個內地新來港家庭選舉嘅活動時都話，內地新移民來港嘅單程證審批係有憲法基礎，絕大部分係嚟一家團聚，認為政府應該協助佢哋盡早融入，而唔係拒諸門外囉！當時林鄭仲叫嗰啲要求收番單程證審批權嘅人士嚟參加呢啲活動，等佢哋親身感受吓新來港人士嘅情況，擺明暗寸呢啲唔了解情況就亂咁嗌嘅泛民！
