天兔來勢洶洶 怪獸出沒注意

唔講得笑㗎，呢個被美國太空總署形容為「怪獸風暴」嘅今年全球最強颱風，中心持續風力超過二百公里，依照預測路徑，極可能正面吹襲本港。天文台尋日一早已掛起一號風球，今日可能改掛八號甚至十號，市民固然要自求多福，港產官僚更要醒醒定定，做好預防措施，唔好再倒瀉籮蟹吖！

話時話，香港雖然多颱風，九月同十月一向係多風季節，但過去正面吹襲嘅超強颱風並唔多。大家印象中對香港帶來最大破壞嘅颱風有幾個，其中一個係六十年代嘅「溫黛」，另一個係七十年代嘅「荷貝」，兩者皆造成大量人命傷亡同財產損失。天文台就話嘞，假若天兔正面吹襲香港，有機會成為上世紀五十年代以來最強嘅颱風。即係話，天兔隨時仲犀利過溫黛同荷貝，問你怕未。

港府究竟有冇應對措施呢？有就有嘅，例如跨部門緊急應變監察系統提升至第二級、保安局統籌各相關部門提醒緊急救援部隊作好準備、民政署啟動地區預備措施、渠務署及運輸署亦會密切監察渠道及路面交通情況喎。聽落頭頭是道，有紋有路，但實際效果如何，仲要睇過至知。

唔係市民唔相信政府，而係政府確實信唔過。唔係咩？過去每逢有天災，港產官僚唔係掉以輕心，就係應對失措，結果經常搞到雞毛鴨血，狼狽不堪，水浸、冧樹、塌泥，呢啲只不過係例牌貨咋，一個唔好彩隨時搞出人命添吖。遠嘅唔講，九九年颱風「約克」襲港，就造成兩死五百人傷；而三年前一場「黑雨」，除咗導致一片澤國，滿目瘡痍，仲奪去兩條人命。

退一步講吖，過去嘅天災就算冇造成人命損失，亦經常搞到七國咁亂。好似舊年十號風球「韋森特」襲港，港鐵應聲跪低，大批乘客滯留車廂及月台，怨聲載道；而自稱世界一流嘅國際機場同樣靠唔住，大批旅客滯留，幾日先至疏導得晒，真係講都冇人信。最好笑係，舊年一個載有膠粒嘅貨櫃畀風暴吹落海，釀成生態危機，唔少市民自發到沙灘執膠粒，而當局居然袖手旁觀，問你服未。

所以話，官僚靠得住，豬乸會上樹。香港已經夠晒亂，今次怪獸來臨，如果再有任何閃失，港產官僚聽揸兜都得喇，叮！