學生哥已經結束悠長暑假，但立法會大會仲未復會，新一屆政府中，行政會議已經縮短暑假，由過往放八個星期減到兩個星期，立法會會唔會效法，減少家吓兩個半月嘅悠長暑假呢？新丁議員慢必陳志全力撐，資深議員大都擰頭，出奇嘅係，長毛梁國雄喺呢件事嘅立場竟然靠近幾個建制派議員。長毛認為，如果要縮短暑假，就要改會期，而改會期又要攞上議事規則委員會討論，好高難度咁話。長毛究竟係怕高難度定係想繼續歎悠長假期啊？

設計圖片

兩個半月暑假，唔少議員去咗唔止一次旅行，暑假都仲未完。慢必話雖然立會放暑假係傳統，其實就算冇暑假，部分議員都會喺新年、復活節、聖誕節等自行放假去旅行，所以放一個月暑假都夠晒啦。

建制派嘅石禮謙一聽到縮短暑假就抬出議會傳統，即刻話︰「我不嬲都好尊重傳統！」民建聯嘅譚耀宗就話，其實立法會放暑假啲時間都唔會嘥，因為議員可以趁呢段時間落區，加上依家立法會工作多咗，一班秘書處職員都可以趁冇會開去抖抖氣，就算人唔使抖，立法會大樓都要有時間維修o架，講到尾，資深議員反對縮短暑假嘅原因層出不窮喇。

第一手消息請下載on.cc東方互動iPhone/iPad/Android/Windows Phone Apps