政壇：高佬賢呻寫字樓泊單車
為咗推廣綠色生活，立法會喺新大樓特設單車泊位，畀議員、職員等使用，白鴿黨議員胡志偉曾經試過踩單車返立會大樓，仲話自己會每朝由屋企踩去港鐵站，然後再放低架單車搭地鐵返工，不過，據聞佢之後並無堅持呢個習慣。最近，漁農界嘅何俊賢（高佬賢）都帶咗架私家單車返立會，佢表明唔係為咗環保，而係往來立法會同港內線碼頭行少兩步啫。
高佬賢帶咗架單車返立法會，先發現原來該處嘅單車泊位唔畀泊過夜。
高佬賢話，佢定期要搭船去離島接觸選民，放定架單車喺立會方便啲，點知唔可以泊過夜，如果改泊入停車場車位，本身已經有部車嘅佢又擔心會被指「double parking」，一個議員違規泊兩個車位，惟有成身汗抬上寫字樓。
