政壇：詩姐濕平同店員咬耳仔
基本法委員會副主任梁愛詩講起法律問題好嚴肅，日前見佢現身金鐘一間超市選購心水食品，期間主動同一名女售貨員搭訕，仲傾到雞啄唔斷，笑得幾開心，盡顯親民嘅一面。
梁愛詩（右）同賣蝦子麵女售貨員好啱傾，兩個笑到四萬咁口。
當日下午一點鐘左右，梁愛詩一襲黑色衣裙單拖走入金鐘太古廣場地庫一間超市，佢冇攞購物籃，徒手拎住一包疑似風乾火腿嘅紙包食品、一樽蛋黃醬、一包香腸，仲有一袋三文治方包，正當佢想行去付款處時，忽然畀一個售賣蝦子麵嘅專櫃吸引住，女售貨員即刻向佢介紹麵食，詩姐一邊聽不時咧嘴而笑，又同女售貨員肩並肩咬耳仔，手指指咁閱讀食品旁邊嘅紙牌，不過佢最後都係冇幫襯。唔知係咪手袋太細，詩姐發現冇帶環保袋，付款時惟有加錢買咗個超市膠袋盛載食品。
