政壇：副局政助訪京一波三折
勁量級颱風天兔打到嚟，航空公司前晚已預告服務勢受影響，仲講到明未來幾日出發嘅人士要先作查詢至好去機場。咁啱咁蹺，特區政府十六名副局長同政治助理籌備咗一輪嘅外訪團就啱啱喺周二（廿四日）出發，天兔來襲，照依家天文台嘅說法，周一航空交通肯定亂晒龍，翌日嘅行程會點，依家真係冇人話得埋，最後關頭加入訪問團嘅政制及內地事務局局長譚志源（Raymond）係團中最高級官員，而個訪問團團長就係身兼運輸及房屋局副局長邱誠武，呢兩個領軍者睇怕要大嘆人在風中轉囉！
設計圖片及對白
團員充當新聞主任
個訪問團嘅五日行程係先赴北京，然後再去湖北，據知，最初無任何司局級官員隨行，訪問團喺北京可能見唔到較高級嘅中央官員，依家加入咗Raymond，預計最少可以見到港澳辦嘅主要領導。講番個訪問團，佢哋由籌辦以來就一波三折，先有特首辦主任邱騰華要跟隨特首出訪重慶，而令副局政助訪京團一度無咗個團長，尋日又爆出政務司司長政助張秀麗辭職，咁訪問團係咪少緊一個成員呢？原來張秀麗個名一早就唔喺訪京團名單之列，相信佢喺成團之前已經諗定唔做，亦冇參加個團。
點知臨到出發前，「天兔」又強勢撲港，一眾團友想唔望天打卦都唔得，究竟佢哋有冇「Plan B」應變呢？波折連連下，我哋仲聽聞佢哋有另一尷尬處。團中成員原本只得副局及政助，佢哋唔係公務員系統，今次出訪亦唔慌有新聞主任隨團，咁點樣向傳媒發稿發相甚至安排記者會呢？Raymond加入北京嘅行程，訪京嗰日問題基本解決，但之後去湖北呢？原來團中成員已經互選出做傳媒出身嘅財政司司長政助羅永聰同食物及衞生局政助陳凱欣「重操故業」，充當今次訪京團嘅新聞主任。
