浪費公帑搞廢柴 阿茂整餅得啖笑
美國前總統列根講得啱，政府唔係解決問題嘅方法，政府本身至係問題所在。嗱，港府就係最大嘅問題喇。
今時今日，智能手機愈來愈流行，流動應用程式（App）日日新鮮，連港府都不甘寂寞，各部門爭相湊熱鬧，加加埋埋總共推出超過七十款Apps，至少使咗二千萬元，係威係勢。本來呢，港府順應潮流，與時並進，係無可厚非嘅，弊在港產官僚眼高手低，有姿勢冇實際，所謂應用程式，缺乏創意，內容空泛，操作複雜，又疏於更新，純粹得個睇字，導致下載率嚴重偏低，淪為市民鬧爆嘅「廢柴Apps」。
嗱，大家即管睇下呢啲廢柴Apps有幾廢。最少人問津嘅係商務及經濟發展局轄下創意香港耗資三十六萬元開發嘅《靈感傳港》，啟用至今下載人數得五百幾咁大把，連街外一個普通App嘅零頭都唔夠，簡直笑死人。
康文署仲搞笑，前排推出《武‧藝‧人生——李小龍》App，簡直可以攞最滑稽功能獎，淨係上載展覽海報，內容冇料到不特止，入面「與龍合影」嘅功能更滑稽夾騎呢，甚至有醜化李小龍之嫌添。
而講到最無厘頭，建築署嘅「築印」可以講係當之無愧，除咗四條海濱長廊，就只有四個殮葬場，認真大吉利是。
至於政制及內地事務局推出嘅《基本法保衞戰》，下載人數話就話有近九千，原來呢個App只不過係畀小學生玩嘅遊戲，同學習《基本法》完全無關。大拿拿使咗近百萬，保衞基本法變咗打機基本法，咁叫做創意喎，你話係咪九唔搭八吖。
正如專家話齋，手機Apps成功嘅先決條件，係解決用家實際需要。可惜港產官僚根本唔係為用家着想，呢啲所謂Apps內容好多只係搬字過紙，大部分資料上網就可以查到，而且更新唔及時，操作又唔夠人性化，點樣吸引用家吖？
講開又講吖，港產官僚做嘢從來都係阿茂整餅，冇嗰樣整嗰樣嘅喇，一味趁熱鬧，以為年晚煎堆，人有我有，幾時真正急市民所急，想用家所想o架。所以咯喎，Apps搞到唔湯唔水一啲都唔出奇，如果唔出事，反而唔正常呀！
公帑亂咁揈，得物無所用，有人話港產官僚係納稅人嘅倒米壽星，真係一啲都冇講錯，叮！
