SUN搞作：少膽虫手記：捉奸
少膽虫太古廣場High Tea完之後，行經英領事館，竟然撞見李漢奸與陳老太勾勾搭搭，圖謀不軌，仲急急腳行入後巷，唔知搞乜鬼。少膽虫好奇心大發，走上前睇個究竟……
「唔好咁啦！」陳老太整一整旗袍領嗔道：「有人望到o架！」「唔怕啦！有人望實仲刺激呀！」李漢奸如狼似虎，「我哋快啲做完咪得囉。」
「嘻，無用鬼！」陳老太作勢打咗李漢奸一下，嗲聲嗲氣咁話：「咁快啲入嚟啦！行後門好唔好？」
李漢奸大喜：「求之不得！求之不得！」少膽虫眼部不適，正要掉頭走，卻忽然閃出一個黑影！
「參見英領事！」李漢奸與陳老太雙雙對黑影下跪，「我哋正要入去同你匯報搞事成果！」黑影揮一揮手低吟：「免啦！你哋小心啲，呢排盡量唔好入嚟，廢事又畀人話支援你哋搞普損！」兩人叩謝告辭。
突然間巷口湧出大隊人，大聲叫嚷：「爹親娘親不及阿爺親！政改不容外國干預！漢奸老太連成壹線！」原來係香城最大黨來捉奸，少膽虫當然拔腿就跑。點知畀人從後推倒，抬頭一望，只見英領事踩過虫軀，回頭吶喊：「『讓領導先走』你聽過未呀？唔想喺壹全霉撈喇？」少膽虫終於醒起，「大愚若智」嘅淫賤黎，先至係真正嘅「若智英領事」。
