戴起眼鏡時，右手掌及手腕間被紗布包紮住。
大家有冇諗過，行街時唔小心撞一撞牆角，可能撞斷手指骨？人稱「趙樓神」嘅長實執行董事趙國雄最近就係咁唔好彩。有一日記者見佢喺中環街頭出現，期間有相熟嘅代客泊車朋友上前問候佢，見佢舉起右手指手畫腳，有講有笑，狀態輕鬆。細心一看，佢嘅右手掌至手腕間被紗布包紮住，唔知發生咩事呢？
趙樓神告別嗰位朋友之後，沿住皇后大道中過馬路，行入位於萬邦行一間連鎖店，打算買防水藥水膠布。佢先向店員查詢，然後行到貨架前仔細端詳，期間仲戴起眼鏡認真研究啲產品。不過，佢睇完一輪都係唔啱心水，最後兩手空空離去。
記者趁機問佢究竟點整親o架？趙樓神話，早排放假時，行行吓街，係咁意撞到牆角，初時情況唔係好嚴重，後來睇醫生至知大件事，竟然撞斷咗右手尾指對上一節骨，諗起至知驚。不過，依家已經冇乜大礙，但為咗避免傷口發炎，要時刻保持乾爽，尤其是沖涼時要小心唔好掂到水，所以咪趁得閒買防水膠布囉！
趙樓神工作咁繁重，日日要簽嘅文件多籮籮，傷勢會唔會影響工作呢？佢諗都唔使諗就話，絕對唔影響工作，日日都會照常返工。咁又簽唔簽到文件呢？佢就笑笑口話：「一定得！唔係就被炒魷啦！」估唔到佢傷咗仲識得講笑喎！
第一手消息請下載on.cc東方互動
