白富鴻已落實到台灣開舖大展拳腳。
近年台灣風勁吹，政商界紛紛攻台發展，經營燕窩生意嘅菁英會榮譽主席白富鴻都部署攻台，下月中將喺台北開首間燕窩店，仲一口氣開夠兩間添！投資咁大，原來係佢睇好中台關係緩和，內地「開綠燈」開放台灣個人遊都未定喎！
喺中港兩地有近二十間燕窩店嘅白富鴻，早喺五年前已計劃攻台，但因怕頻頻飛好煩，遂打消念頭。直至近日覓得台灣合作夥伴，一拍即合，決定進軍台灣發展。白富鴻預計，台灣個人遊一旦開通，爭住去台灣玩嘅內地人一定大排長龍，到時定必財源滾滾來。不過，政治嘅嘢實在好難講，佢個如意算盤係咪打響，真係要拭目以待。
佢計劃將貴價燕窩、花膠同元貝等帶進台灣，話唔定成功變身台灣燕窩大王喎！
第一手消息請下載on.cc東方互動
