伍士銓過去曾帶同考古機械車進入金字塔。（受訪者提供）
曾先後研製機械車探索火星同埃及金字塔嘅港產探險家伍士銓，苦等咗兩年幾，終於有望喺明年底再次登上金字塔，揭開其神秘面紗。不過，由於受埃及政局動盪影響，當地最高文物委員會停止所有金字塔嘅探索工作，要等有關當局發出批文先可以出發。此外，諗頭多多嘅伍士銓打算喺澳門搞「法老王圖坦卡門」面具展覽，但依家仲搵緊場地，並邀請埃及古蹟最高委員會前秘書長札希．哈瓦斯（Zahi Hawass）來港演講。
伍士銓將繼續出動考古機械車（Djedi），走入有四千六百多年歷史嘅胡夫（Khufu）金字塔內，窺探王后墓室第二扇門背後嘅秘密，確認係咪仲有秘密墓室。Djedi重量不足十磅，由兩卡車緊扣組成，上面裝有可伸縮嘅微型鏡頭，喺極狹窄嘅金字塔內可以隨意轉彎，又有小車輪幫手，機械車爬上四十幾度嘅金字塔斜坡毫無難度。不過，由於埃及政局動盪，睇嚟佢要再等吓喇。
第一手消息請下載on.cc東方互動
