立會兩路劏顯明 追殺貪官勿手軟
有人話，花名係一個人嘅真實面目，真係一啲都冇講錯。前廉政專員湯顯明被踢爆貪杯好酒大花筒，即時多咗個花名叫「明顯劏」，即係話佢明顯係一隻違規亂紀嘅大醉貓，日日返工茅台宴客劏白鶴。到咗最近，獨立檢討委員會調查報告揭出貪湯更多貪腐內情，大家估吓佢又多咗乜嘢新花名？答案就係「明顯等劏」，即係等落鑊被劏咁解，你話係咪一針見血吖。
嗱，第一個準備「劏顯明」嘅就係立法會。話說獨立檢討委員會報告出爐之後，貪湯更多不為人知嘅貪腐情節驚人曝光，而且好多內容仲同佢喺立法會帳委會嘅供詞有矛盾添。所以咯喎，立法會決定兵分兩路追殺，其中帳委會下星期三、四重新召開聆訊，追究佢涉嫌發假誓作假證供之罪；而負責調查貪湯醜聞嘅專責委員會亦要求祭出特權法尚方寶劍，以便長期及更深入跟進醜聞，雙劍合璧「劏顯明」！
叮佢個鎯鎯，唔係獨立檢討委員會踢爆，都唔知貪湯原來唔止貪婪，更加係滿口謊言。明明廉署內部規定酬酢開支包括酒水，佢居然向帳委會聲稱唔知酒水及用餐開支唔可以分單開數；明明任內瘋狂送禮嘅開支高達一百三十萬元，佢居然聲稱只係廿二萬元。喂，貪湯咁叻弄虛作假，不如自封「造假專員」，咁咪可以名正言順成為廉署肅貪倡廉嘅反面教材囉。不過咁，立法會唔係旅遊景點，唔到你好似以前公帑遊埠咁，鍾意就遊一遊，唔鍾意就提早走，千祈唔好諗住缺席帳委會聆訊呀，所謂醜婦終須見家翁，你嘅貪腐醜聞臭不可聞，都唔爭在多一條發假誓罪名喇，係咪？
講起真係可悲，堂堂前廉署一哥，涉嫌貪腐不特止，仲要涉嫌發假誓畀假口供，如果咁都可以逍遙法外，香港嘅法治及廉潔招牌揼得啦。呢，最新調查顯示，本港廉潔評分又下跌，以一百分為滿分，受訪青年對「廉潔」評分只有六十五點一分，比上次調查顯著下跌二點四分，唔使問阿貴，實係被前特首曾蔭權爵士同貪湯拖累喇。
貪湯貪腐等被劏，各方追殺勿手軟。立法會固然要履行職責，追究貪湯絕對唔能夠手軟，廉署調查貪湯更加唔能夠徇私枉法，包庇放生。正所謂，月圓人缺倍添愁，尋日中秋節貪湯睇怕都幾難過，一諗起自己要面對立法會兩路追殺，飲茅台都解唔到愁喇，叮！
