SUN搞作：少膽虫手記：食暈壹全霉
少膽虫細個地理肥佬，結果前日編輯肥豪拎條題過嚟話自由行再多三個城市，會有一千九百萬人殺嚟香港喎，呢啲《爛果》狗噏開嘅，少膽虫諗都唔諗就准奏。點知事實係上年都係得二千三百一十萬人次來港，結果咪畀香港第一大黨嗰位局長「蘇哥」插到壹戙都無。「少膽虫！同我睇吓可唔可以做佢黨嘅金主擺平佢！」淫賤黎如是說。
少膽虫於是打電話約蘇哥食飯，點知蘇哥又無推。「去邊食呢？陸乳定福冧門？」蘇哥問。少膽虫先醒起今個月順手開數買咗十打月餅，唔係好夠使，就反建議：「不如嚟壹全霉飯堂吖！你見個醉酒佬同為食精都食到好開心o架！」蘇哥都想視察?解放軍演習之後堆填區變成點，欣然應允。
「嚟嚟嚟，隨便揀！有好多嘢食，有饅頭餡三文治、苦過弟弟涼瓜炒橡筋牛肉、餅乾夾花生醬……」少膽虫介紹幾道撚手嘢畀蘇哥，「試吓呢度特色飲品啦－清水灣清水！」
「呢啲嘢，係人食嘅咩？」蘇哥皺起眉，搖搖頭。少膽虫果斷回應：「唔係。因為呢度嘅人根本無時間食飯，得懶虫先會食。」蘇哥對眼睜到大一大。
「何況，唔當佢哋係人好出奇咩？」少膽虫用口叼住半塊餅乾，引用為食精「菜欄」嘅文章同佢解釋：「壹全霉飯堂的毛病出在食物太多，但太不用心去做，沒有母親煮給兒女吃的心思，做出來的，就是飼料。」
