城中鏡：佔中論壇悶親拔萃仔
拔萃男書院尋日搞咗場「宗教與政治」論壇，請來三位校友嘉賓，分別係佔中發起人戴耀廷、監警會主席翟紹唐同立法會議員田北辰。
翟紹唐（中）一開始就講明唔會討論佔中，但戴耀廷（左）就點都將話題扯到佔中。右為田北辰。
戴耀廷同田北辰唇槍舌劍，悶到台下學生搵周公。
做主持嘅翟紹唐一開始已講明唔會討論佔中，反而問在場嘅戴耀廷同田二少，宗教信仰同佢哋從政有冇關係。戴耀廷於是話係神要佢搞埋佔中呢啲咁激嘅行動，又話用過所有方法爭取普選都唔得，惟有搞公民抗命。做反方嘅田二少就反駁話，普選解決唔到所有問題，就算有普選特首都有民生、房屋等問題，所以最重要係人，而唔係制度。
舉手表態得啖笑
兩人喺台上你一言、我一語，唔知係咪班師弟嫌佢哋太悶，現場所見除咗啲高年班學生聽得比較入神外，低年班學生差唔多全部「頂唔住」，未夠半個鐘已有大半人瞓着咗搵周公。有老師仲即場捉走兩個叫極都唔醒嘅學生去「照肺」，認真慘情。
差唔多去到論壇尾聲，有校友建議不如嚟個現場調查，睇吓支持同反對佔中嘅學生邊方多啲。有得舉手表態，班拔萃仔即時醒晒，但心水清嘅翟紹唐就好醒目，即時將題目轉為「對佔中有睇法就舉手」，結果在場七成學生都舉手，但由於唔知班學生支持定反對，校方就唔使咁尷尬，佢呢招都算高明喇！
