立法會尋日公布，上屆離任議員需要交出嘅物品共有三百九十四項，呢啲物品真係「要幾趣、有幾趣」。淨係座枱電腦、手提電腦等硬件設備，共有成百部咁多，而打印機就成為最貴嘅項目，唔少議員一買就買部兩、三萬元嘅專業級打印機，其中一部仲要近四萬六千元，有乜嘢文件要印得咁專業呢？

設計圖片及對白

又例如有位好識歎嘅議員，就大拿拿用兩萬多元買咗張皮櫈，究竟呢張「天價椅」有乜嘢功能？真係得嗰位議員至知。亦有議員用咗一萬二千元買個儲物櫃，到底用乜嘢物料做咁巴閉呢？

不過，最好笑都係有議員連屬「古董」級數嘅打字機都買，雖然只係千多元，但有冇咁嘅需要呢？另有議員用咗七千多元購買工業級嘅大型裁紙機，如果唔講，分分鐘以為佢開工廠添！

沒有最奇怪，只有更奇怪，有議員用四千多元買咗部發電機，甚至有人用六千元買咗個「輕便式活動涼亭」，一睇就知係議員做地區活動時嘅設備。呢啲物品始終係有折舊嘅，尤其係電子產品，結果依家要賤價拍賣，納稅人啲錢真係使得冤枉。究竟散到幾多倉底貨，相信秘書長陳維安都幾苦惱。

第一手消息請下載on.cc東方互動iPhone/iPad/Android/Windows Phone Apps