政府尋日公布有關副局長及政治助理訪京行程同人腳，由下周二（二十四日）啟程，為期五日，除咗北京仲會去埋湖北，參加研修課程同考察，但最特別係忽然多咗個政制及內地事務局局長譚志源隨行，唔通佢想假借陪副局政助訪京之名，秘密向中央匯報香港政改嘅最新發展？非也，原來佢此行係為咗「打救」呢個群龍無首嘅訪京團，等佢哋有機會見到較高級嘅中央官員。

譚志源

過往副局政助訪京一般由特首辦主任帶隊，但由於特首辦主任邱騰華要喺嗰段時間陪特首外訪，令副局政助無咗個團長，最後惟有互選出較資深嘅運房局副局長邱誠武暫代有關職務。須知內地官場一向好講究官階對等，香港嘅副局政助，喺內地嚟講只係低級官員，好難見到港澳辦主任等正部級京官，因此本身做過副局同特首辦主任嘅譚志源，就決定隨團出訪參與首兩日喺北京嘅行程，等班團友見北大人時唔會太失禮。

第一手消息請下載on.cc東方互動iPhone/iPad/Android/Windows Phone Apps