改朝換代係大勢所趨，連教育界老牌團體香港教育工作者聯會（教聯會）都唔例外，據聞自九十年代開始出任教聯會會長嘅楊耀忠將退任會長，佢又曾向身邊人講笑話「自己落車好過被人逼落車」喎，如果其他建制團體領導層都識得自行退伍，就唔會被外界批評戀棧權位，或者係久唔久聽到舊人阻住新生代上位嘅消息喇！

設計圖片及對白

縮規模 總部宣傳國教

教聯會將於今年底舉行換屆選舉，消息話楊耀忠最近主動向領導層表示，希望退位讓賢結束近四分一世紀嘅會長職務，改任榮譽會長。至於邊個係接班人？據聞現還在醞釀中，暫未有定案。

消息又話，其實楊耀忠近年都陸續減少公職，希望畀多啲機會新一代上位，例如部分學校校監職務都交棒畀其他教聯會中人擔任。不過，咪以為佢退任會長在即，教聯會發展就會停落嚟，最近原來仲有新搞作。據聞教聯會最近喺會址劃咗個一千呎嘅地方，同有心人合作搞超級市場，售賣平價食品同文具等，試行一個月後將檢討成效，講到尾呢個新猷都係想同教協爭一日之長短，鬥吸客同增加會員數目。

講開教聯會，不得不提佢轄下國民教育服務中心去年因出版《中國模式國情專題教學手冊》掀起連串國教風波，今年六月底租約期滿未有續約，教育局決定重新招標。據聞教聯會再三考慮後唔會再參與投標，決定縮小規模喺教聯會總部內宣傳國教，有需要才向學校租借較大場地喎，換言之今後未必會再有以往嘅國教日營喇！

第一手消息請下載on.cc東方互動iPhone/iPad/Android/Windows Phone Apps