今夕人月兩團圓 奈何香江似破船
海上生明月，天涯共此時。今日係中秋節，又係家家戶戶慶團圓的良辰吉日，如果你打算同親朋戚友共聚賞月，記住今晚七點左右係月亮最大最圓嘅時候，特別有人月兩團圓嘅佳節氣氛o架。當然啦，今晚仲有一個願望，六合彩金多寶高達八千萬，如果一注獨得咯喎，咁就好似古人所講，但願人長久，千「萬」共嬋娟嘞。
不過咁，願望歸願望，現實還現實，六合彩邊有咁易中吖，小賭怡情，大賭亂性，大家買個希望好嘞，千祈唔好太着緊，始終都係面對現實好啲。講真，圓月皎潔，丹桂飄香，佳節當前，邊個唔想同家人共敍天倫，錦上添花吖，問題係眼前香港表面風光，暗裏陰乾，經濟陰晴不定，前景烏雲密布，小市民為口奔馳，搵食艱難，唔係個個有心情賞月o架。呢，日前有政黨發表第二季「兩餸一湯」指數，發現市場上食材平均價格按年升咗一成半，柴米油鹽樣樣加價，基層家庭隨時有巧婦難為無米炊之嘆吖！
講起都幾無奈，香港回歸後過咗十六個中秋節，月亮年年一樣咁圓，但係香港嘅經濟民生就一年不如一年。古人佳節賦詩填詞，明月幾時有，把酒問青天。今日太一叮中秋慨嘆，明月幾時有，把火問高官。喂，你哋班港產官僚幾時至真正做到「福為民開」呀？香港人幾時至可以過番個安安樂樂嘅中秋節呀？
咁講啦，中秋月亮圓唔圓，靚唔靚，其實最關鍵唔係邊個時間睇，而係用乜嘢心情睇。今時今日唔少市民生活負擔沉重，根本冇心情欣賞月亮。唔講其他，就講競爭力每況愈下就夠令人擔心啦，外有新加坡嘅競爭，內有內地城市嘅挑戰，但係香港依然深陷政治泥沼不能自拔，日鬥夜鬥，你死我活。唉，面對呢一幕，嫦娥姐姐都冇眼睇喇！
講到呢度，太一叮不禁諗起唐詩《春江花月夜》：「人生代代無窮已，江月年年只相識。不知江月照何人，但見長江送流水。」你話嘞，呢幾句詩係咪目前香港嘅寫照吖。
無論點都好，今日係花好月圓嘅傳統佳節，大家為香港前景擔憂嘅同時，不妨暫時拋開煩惱，與家人好友共度良宵，過番個快樂中秋！
