城中鏡：馮錦成收購當追女仔
近年港銀有唔少收購合併，除咗中資企業，勁疊水嘅日資企業都虎視眈眈，AEON信貸董事總經理馮錦成就自爆早幾年試過收購，最後撻Q收場，佢話情況就好似「追唔到嘅女仔」，唔好提喎!
馮錦成話收購目標會聚焦金融機構同保險顧問公司。（資料圖片）
早兩日永亨銀行出晒通告話正在洽購階段，當大家都估緊邊個係潛在收購方之際，馮錦成就話估值太貴，無興趣喎！佢仲自爆，AEON幾年前曾經提出收購，但係唔成功，咁究竟AEON睇中咗邊間公司？馮錦成就話，追唔到嘅女仔，梗係唔開名啦！再問多兩問，原來係信用卡公司。
翻查資料顯示，○九年建行亞洲收購咗美國國際信貸香港，唔通「追唔到嘅女仔」就係講緊佢？
