城中鏡：阿Greg偷橋扮喬布斯
要制訂貼合民生嘅政策，問責官員除咗要發揮政治能量之外，仲要同市民拉近距離。商務及經濟發展局局長Greg蘇錦樑尋日主持「數碼21」資訊科技策略公眾諮詢文件發布會就搞搞新意思，向已故蘋果教主喬布斯（Steve Jobs）偷師，搞到發布諮詢文件好似蘋果產品發布會咁。
阿Greg開發布會向喬布斯偷師。
喬布斯
阿Greg雖然着住西裝出場，但就特登唔打呔，打扮休閒，坐喺張高櫈度談笑風生，仲攞住部平板電腦不停「篤、篤、篤」，學晒喬布斯咁，一面講嘢，一面對照後面嘅短片，向在場傳媒講解依家資訊科技有幾發達，阿Greg仲喬布斯上身咁加入唔少身體語言同手勢，希望令演講過程更加精彩。
雖然就算阿Greg點落力，都好難有喬布斯咁嘅神級演講表現，何況照抄都只係A貨，點都不能超越。
