城中鏡：CY太座偕囡囡 中環行街濕平
特首CY梁振英嘅細女頌昕爭取機會，喺香港同爸爸媽媽過埋中秋至返英國繼續學業。頌昕尋日同媽媽唐青儀一齊喺中環食晏，之後仲一齊逛街，感情真係好。
梁太（左）同囡囡頌昕爭取機會相聚。
梁太（右二）吩咐司機（左）將座駕由歷山大廈駛至置地廣場。
梁太（左）幫襯「鱷魚袋王」，店員熱情招呼。
買完心頭好，梁太（右）同囡囡（左）滿足地登車離開，司機幫手開車門。
尋日下晝約兩點鐘，一身行政套裝嘅梁太同頌昕孖住現身中環歷山大廈，佢哋同一位男士食完午飯講再見。唔少途人都認得梁太，佢毫無架子，大方點頭微笑。跟住見有一政府座駕停泊喺大廈外，司機正打開車門準備接載佢，但佢並冇上車，反叫司機先駛車離開，然後同囡囡返回歷山大廈。
名袋店熟客
梁太同頌昕由歷山大廈穿過中環港鐵站步向置地廣場，再穿過一間國際名牌店，然後搭扶手電梯上三樓，顯然對中環好熟悉，原來佢哋嘅目的地係一間新加坡名袋專賣店，呢度主打七彩繽紛嘅鱷魚皮手袋，梁太嚟呢度攞番啲皮具。佢哋一踏進店內，店員隨即一擁而上招呼梁太，相信佢係呢度嘅熟客。記者同佢哋傾咗兩句，頌昕話好開心，因為今年中秋可以留港同父母一齊過，兩母女最後喺置地廣場上車離去。
講起中秋，CY同太太上星期喺禮賓府舉行中秋園遊會，兩個女都有喺度，仲請咗智障人士同家長及少數族裔人士出席，又有行政會議成員，一共八十幾人，不知幾熱鬧。CY好有心思，送咗含羞草同蟋蟀畀小朋友做禮物。
CY又喺網誌話，呢啲係簡單易養嘅生物，小朋友都覺得好有趣。
