政壇：搞搞政：爭新界北上位跨境童議題搶手
喺二○一六年立法會選舉係咪會新增新界北選區仲係言之尚早，但部分位處北區嘅議題歷久常新，提早惹來各大政黨政團爭相關注。
設計圖片及對白
話說建仔同白鴿黨早前前後腳約見教育局官員講跨境學童問題，前者早一日約到當局去傾跨境專網，但疑似「捉蟲」只發新聞稿，搞到遲一日先同當局會面嘅白鴿黨執番身彩，咁啱得咁蹺同建仔同日舉行記者會，但建仔最後搵到教育局局長吳克儉出席佢哋有份舉辦嘅座談會，正式宣布跨境專網詳情，總算喺最後關頭攞番個尾彩。
對於喺跨境學童呢個議題同白鴿黨短兵相接，建仔嘅北區區議員劉國勳強調最緊要係解決問題，又自言佢哋早於三、四年前已提出跨境分流政策，相信其他招數只係屬於輔助性質。至於最近不時以廉政公署前調查主任身份現身嘅白鴿黨總幹事林卓廷，其實亦靜靜起革命關注北區議題，最近仲出任該黨教育副發言人，似乎有意喺跨境學童等教育議題同建仔長期抗爭。此外，明顯想染指北區嘅仲有以范國威為首嘅新民主同盟，只要係涉及中港嘅議題，佢哋幾乎都會沾手。
大家都知道，跨境學童嘅問題每年九月新學年前夕都會係外界焦點，建仔、白鴿黨同新民主同盟提早部署同做好準備工作實屬無可厚非，但議題擺在眼前，邊個可脫穎而出成為疑似代言人，就要睇下邊方面較有諗頭同對呢個範疇較有研究喇！
