政壇：美的上市何享健大進帳
大陸金魚缸接近一年冇新股上市，但各位公司管理層如果想發達，通過資產重組整體上市都不失為一條「造富」捷徑。好似趕喺中秋節前最後一個交易日完成整體上市嘅內地小家電龍頭美的集團，尋日就誕生咗八個大富翁，其中身為大老闆嘅何享健，身家更加急增至超過二百七十億元（人民幣‧下同）。
美的集團今年上半年營業收入已經去到六百六十億元，純利二十六億五千萬元，如果按照營業收入排名，整體上市之後就會撼贏青島海爾同格力電器，成為A股市場最大嘅白色家電上市公司。而為集團創造經營佳績嘅一班核心管理層，身家亦都跟隨今次整體上市齊齊升級，包括董事長方洪波、總裁黃健、高級副總裁袁利群等七個高層，手上持有嘅上市公司股票，市值分別升到四億至十六億元不等。
