政壇：Cool魔助家庭議會宣傳
政府不時會邀請影視紅星推廣某啲計劃或政策，最近就搵咗喺電視劇飾演飛機師一角爆紅嘅「Cool 魔」張智霖，佢早前獲邀同家庭議會主席石丹理拍攝電視宣傳短片，呼籲公司同市民參與年度家庭友善獎勵計劃，據聞呢段短片稍後仲有機會喺黃金時間播放添!
「Cool 魔」張智霖獲邀為家庭議會拍攝電視宣傳短片，呼籲公司同市民參與年度家庭友善獎勵計劃。（資料圖片）
民政事務局常任秘書長楊立門尋日負責主持計劃啟動禮，曾喺首屆計劃獲獎嘅協成行同親子王國都有派出員工出席表示支持計劃，其中協成行代表仲引述數據話，佢哋成立六十多年來，百分之九十五員工嘅放工時間，都可以喺原訂時間後二十分鐘完成工作並離開公司。
家庭友善獎勵計劃於二○一一年首次舉辦，新一屆設有企業組、中小企組同新增嘅機構組，即喺本港運作嘅非政府組織同社會企業都可以參加，提名僱主參選同僱主報名參加截止日期分別係今年底同明年初，參選結果將於明年四月公布。
